Додека обичниот македонски граѓанин живее во невидена сиромаштија и едвај ги задоволува основните потреби за живот, пратениците од жироката коалиција ДПМНЕ-СДС сложно, континуирано и бесрамно ги крадат граѓаните преку веќе озлогласените патни трошоци. Имено, народните избраници во 2023 година потрошиле речиси 20 милиони денари, или 320 илјади евра, само за патни трошоци, велат од Левица.
Овој, како што го нарекуваат, крајно лицемерен чин на пратениците, според Левица е последен во долгата низа клептомански постапки, каде што владејачките партиски елити континуирано покажуваат дека единствен нивен интерес се личното богатење и уживањето во привилегиите што ги имаат како јавни функционери, а не работењето во интерес на граѓаните.
„Да биде уште потрагично, пратениците што најмногу наплатиле за патни трошоци се комплетно непознати за јавноста, кои во текот на целата година, па и целиот нивен мандат, немаат направено ништо забележително.
На пример, Јадранка Поцкова од ДПМНЕ, која наплатила околу 670.000 денари, Љубица Спасова од СДС со околу 610.000 денари и Миле Талевски од СДС со околу 600.000 денари се дел од пратениците што граѓаните, на чиј грб се богатат, воопшто и не знаат дека постојат“, се истакнува во нивната реакција.
Потсетуваат дека Левица уште во 2021 година предложи закон за драстично намалување на патните трошоци за пратениците во Собранието, закон што, како што појаснуваат, беше одбиен од ДПМНЕ-СДС иако и двете партии во својата програма декларативно се залагаат за намалување на патните трошоци на функционерите.
