Партијата која во првиот круг не успеа со ниту еден кандидат за градоначалник да влезе во вториот круг, но затоа освои доста советнички места во повеќе општини, го објави својот официјален став во врска со евентуалната поддршка на некој од кандидатите во вториот круг.
Во прилично долгото соопштение објавено од партијата, а донесено од Президиумот, се вели дека „Левица има склучено само коалиција со народот и со граѓаните кои живеат од сопствениот труд и чии класни интереси ги застапува, и одбива било каква формална коалиција со било кој друг политички субјект – било од власта, било од опозицијата“.
Понатаму, велат дека ќе бидат опозиција било на владејачката СДСМ, било на опозициската ВМРО-ДПМНЕ (онаму каде што има освоено мнозинство советници): „Во оние општини каде што во советите постои апсолутно мнозинство од редовите било на ДПМНЕ, било на СДС – нашите советници ќе делуваат како опозиција и ќе бидат гласот на обичниот човек, внатре во институциите“.
„Во овој историски миг, гледајќи ја поголемата политичка слика и државниот интерес на Републиката, наша политичка должност – како нова генерација на неподмитливи македонски политичари – е да не бидеме сламката за спас, за која ќе се фати хибридниот режим на Заев и ДУИ, за свое понатамошно опстојување и владеење, туку ќе бидеме клучните политички актери кои ќе го зададат финалниот удар за дефинитивен пад на заевизмот и конечно развластување на ДУИ, како спој на поданичко и силеџиско владеење, кое е спротивно на националните интереси и на АСНОМ-ските идеали на македонскиот народ“.
Во однос на гласањето за градоначалници во вториот изборен круг, ставот на партијата е следниов: „Упатуваме на разумот и совеста на нашите членови, поддржувачи и симпатизери – истите да гласаат по сопствено убедување. Левица напоменува дека, во овој момент, општокорисно е да се следи бранот на антивладиното настроение на народната волја, против погубните политики на квислингот Заев и корумпираните структури на ДУИ, кои ја имаат окупирано секоја пора на општеството, за конечна детронизација на нивните мафијашко-криминални клики во заминување“.
