Премиерлигашот замената за нашиот Езџан Алиоски се чини ја пронајде во гигантот од Мадрид, додека иднината на Македонецот е сѐ понеизвесна.
Очигледно Марсело Биелса има сериозна намера да направи промена на левата дефанзивна латерала каде игра нашиот Алиоски. Информациите кои доаѓаат од Островот велат дека Лидс Јунајтед е сериозно заинтересиран да се засили со лев бек од Реал Мадрид кој наредната сезона би бил прв избор во тимот.
Станува збор за 19-годишниот Мигел Гутиерес кој настапува за вториот тим на „Кралевите“ во третата лига, а сѐ уште нема настап за првиот тим. Но, е младински репрезентативец на Шпанија.
Гутиерес нема иднина во првиот тим на „Сантјаго Бернабеу“ бидејќи не може да се натпреварува со Ферланд Менди, ниту пак со Дејвид Алаба за кој на големо се зборува дека летово сигурно ќе се пресели во Мадрид.
Алиоски е во Лидс од летото 2017 и се чини го достигна максимумот. Биелса сезонава упорно го користи како лев бек, иако дефанзивата на Џани му е слаба страна, а е далеку попродуктивен во нападот како лево криво. Но, таму конкуренцијата со Рафиња, Харисон, Кошта и Поведа е огромна.
