„Голф петка“ за многумина остана омилената варијанта на познатиот модел на Volkswagen.
И додека кај нас моделите од гамата TDI беа најскапи, остатокот од светот се восхитуваше на верзијата R32 со атмосферскиот 3.2 VR6 мотор. Тоа беше верзија резервирана за најпребирливите корисници кои дефинитивно не размислуваа за потрошувачката кога купуваа Golf. Golf R опстојуваше во понатамошните генерации, но со помал 2.0 TSI мотор.
Сепак, како што пренесува The Intercooler, во игра имало многу посериозни изведби. GTI W12-650 беше уникатен, но како што открива Маркос Маркес за споменатиот магазин, Volkswagen подготвил Golf со погон на сите тркала, придвижуван од V10 мотор. Токму истиот мотор кој тогаш „предеше“ во Audi R8 и Lamborghini Gallardo. За разлика од гореспоменатиот Golf, тој имаше попречно поставен мотор напред.
Тоа беше во време кога Volkswagen дури размислуваше да влезе во Формула 1. Моторот во Golf произведуваше околу 500 КС и вртеше до 8200 вртежи во минута.
„Го видов и слушнав како работи неколку пати, и тоа беше прилично луд автомобил“, сведочи Маркес.
Екскурзиите на Volkswagen не застанаа тука. Така, во 2014 година на производствената линија пристигна Golf 7 со 2.0 TSI мотор и околу 400 КС. Погодувате, Дизелгејт го прекина проектот R400. Имаше и R420 со петцилиндричен мотор на Audi, но и тој проект запре. Volkswagen сакаше да го вгради истиот мотор на осмата генерација, но Audi се спротивстави - тоа би било канибализам во споредба со RS3.
