Бразилскиот напаѓач од редовите на Арсенал успешно демонстрираше како во само една акција може да се добијат два жолти картони и автоматски црвен.
„Топчиите“ синоќа гостуваа кај Вулверхемптон Вондерерс во рамките на 24. коло во Премиер лигата. Славеа со минимални, но доволни 0:1 благодарение на голот на дефанзивецот Габриел Магаљајс во 24. минута, но последните дваесетина минути ги минаа во стравување за победата бидејќи мораа да играат со играч помалку.
А, тоа се случи поради една наивност на 20-годишниот Габриел Мартинели. Прво турна противнички играч додека овој изведуваше аут, судијата Мајкл Оливер почитуваше предност за да продолжи акцијата, а потоа направи фаул над друг играч, па Оливер двапати замавна со жолтиот картон и потоа му покажа и црвен.
