Бизарна ситуација се случи попладнево во Гостивар на второлигашки натпревар помеѓу истоимената домашна екипа и Тетекс.
Само што натпреварот почна, во 2. минута гостинскиот голман Александар Анѓелковски ја фати топката в раце надвор од шестнаесетникот, по што главниот судија Дејан Младеновски од Скопје, следејќи ги правилата, му покажа црвен картон.
Тоа не му се допадна на напаѓачот Христијан Кировски па му го зеде црвениот картон, го искина на парчиња и го фрли на земја.
Судијата се најде во небрано, па мораше да истрча кај четвртиот судија, инаку негов брат (Марјан Младеновски), и да земе нов црвен картон, за да може да го исклучи и нервозниот Кировски.
Иако играше со два играча повеќе, фаворитот за пласман во 1.МФЛ успеа да го скрши отпорот на гостите дури во второто полувреме и на крајот да прокнижи убедлива победа од 5:0.
