ПСЖ и Манчестер Јунајтед почнаа преговори за трансфер на Нејмар (31), објави L'Equipe.
Бразилецот, кого парижаните го платија рекордни 222 милиони евра за да го доведат од Барселона во 2017 година, размислува за промена на клубот иако неговиот актуелен договор е до летото 2027 година. ПСЖ е подготвен да се ослободи од Нејмар, а ќе остане и без Лионел Меси, кој најави заминување.
L'Equipe тврди дека за Нејмар се заинтересирани неколку клубови од Премиер лигата, но досега најмногу напредувале преговорите со клубот од Манчестер. Покрај Јунајтед, претходно се споменуваше и интересот на Челси и Њукасл.
Да потсетиме, кога беше во Барселона, Нејмар го пофали англискиот фудбал и рече дека им се восхитува на Манчестер Јунајтед, Челси, Арсенал и Ливерпул.
Јунајтед е на четвртото место во Премиер лигата и му треба еден бод во последните два натпревари за да обезбеди пласман во Лигата на шампионите следната сезона. Со овој мотив, L'Equipe тврди дека Касемиро (31) се обидува да го убеди својот сонародник да дојде во Јунајтед, каде би играле заедно како во репрезентацијата на Бразил.
Манчестер Јунајтед сака да го донесе Нејмар на позајмица, додека ПСЖ сака да го продаде. Се очекува средба меѓу претставниците на Нејмар и спортскиот советник на ПСЖ, Луис Кампос, кој ја извршува функцијата спортски директор. L'Equipe заклучува дека Челси го следи развојот на ситуацијата, но голем проблем е што не се пласираа во Лигата на шампионите во една разочарувачка сезона.
Нејмар кариерата ја започна во бразилски Сантос. Барселона го доведе во 2013 година за 88 милиони евра и таму беше дел од фантастичното напаѓачко трио со Меси и Луис Суарес со кои освои сè. Откако дојде во ПСЖ, постигна 118 гола и асистираше на 77 од нив на 173 натпревари. Transfermarkt го цени на 70 милиони евра.
