Играчот на Тулуз, Закарија Абухлал, предизвика скандал во Франција откако навреди локална политичарка.
L'Équipe пишува дека мароканскиот играч од средниот ред за време на прославата за освојувањето на Куп де Франс ја навредил Лоранс Арибаж, спортска асистентка во градската управа на Градот Тулуз. Имено, проблемот настанал кога тренерот на тимот, Филип Монтанје, држел говор на свечениот прием кај градските власти. Играчите биле прилично гласни, а Арибаж ги замолила да се стишат. Нејзината молба не ја прифатил добро Абухлал.
„Во мојот дом жените на зборуваат така со мажите“, дофрлил Мароканецот.
Арибаж подоцна се обидела да ја намали штетата од инцидентот.
„Играчите баш и не сакаат некој да ги стишува на тајков начин...“, рече таа.
Без разлика на тоа, Тулуз го суспендираше својот играч.
„Со оглед на сериозните обвинувања против играчот на фудбалскиот клуб Тулуз, Закарија Абухлал, клубот објавува дека играчот ќе тренира одвоено од професионалниот дел сѐ до дополнително известување, во очекување на резултатите од внатрешната истрага“, беше објавено на официјалната веб-страница на клубот.
Финалето на францускиот куп се одигра на 29 април на стадионот „Стад де Франс“ во Сен-Дени, а пред 78 илјади гледачи Тулуз убедливо со 5:1 го победи Нант.
Да потсетиме, Абухлал е репрезентативец на Мароко и беше дел од големиот успех на Мундијалот во Катар. Во фазата по групи ѝ даде гол на Белгија. Роден е во Холандија од татко Либиец и мајка Мароканка. Беше младински репрезентативец на Холандија пред во 2020 година да одлучи да игра за Мароко, иако го бараше и Либија. Како што во една прилика кажа, го одбрал Мароко затоа што израснал помеѓу мароканската заедница во Холандија.
Абухлал од порано е познат по своите прилично затворени ставови. Се „прослави“ кога одби да игра за свој поранешен тим на 17 мај, кога е светскиот ден на борбата пртотив хомофобијата, ден кој има за цел подигнување на свеста за правата на ЛГБТ заедницата. Пред Тулуз, каде дојде летото 2022, настапуваше за АЗ и ПСВ.
