Мароканците по поразот од Франција во полуфиналето на Мундијалот во Катар упатија жалба до Меѓународната фудбалска федерација (ФИФА) поради судењето на мексиканскиот судија Сесар Рамос.
Имено, за нив спорна е ситуацијата од 27. минута кога резултатот беше 1:0 за Франција. Тогаш Тео Ернандес во францускиот шестнаесетник го собори Софјан Буфал, но Мексиканецот не покажа на белата точка, а од ВАР собата не го повикаа да го провери инцидентот. Згора на тоа Рамос и му додели жолт картон на Мароканецот бидејќи оцени дека направил фаул во напад.
„Кралската фудбалска асоцијација на Мароко силно протестира против судењето на Сесар Артуро Рамос Паласуелос на натпреварот на мароканската репрезентација против Франција. Нема да се двоумиме да ги браниме правата на нашиот тим и да повикаме правда во преземањето на неопходните мерки во врска со неправедното судење кон мароканската репрезентација“, се вели во соопштението на Мароканците.
Инаку, Мароко утре од 16 часот против Хрватска ќе игра натпревар за третото место на Мундијалот, а ФИФА веќе го избра судијата на тој дуел, и повторно предизвика полемики.
Во центарот ќе биде Абдулрахман Ал Џасим од Катар, кој го на Мундијалот отсуди само еден натпревар и тоа во првото коло кога САД и Велс одиграа 1:1.
