Сигурно веќе ви е познато дека медот може да помогне при воспалено грло, но овој чудесен природен производ има и други предности за кои можеби не сте ни свесни. Исто така, има и недостатоци за кои треба да знаете.
Според студија од International Journal of Research and Review, природниот мед кој не е обработен или филтриран, ја намалува дисменорејата (болната менструација), на тој начин што делува антивоспалително.
Медот исто така помага и за намалување на силата на кашлицата. Консумирањето мед може да помогне и во намалувањето на симптомите на инфекција на горните дишни патишта, како што е кашлицата. Според клиниката Мајо, студиите покажале дека медот делува еднакво добро, ако не и подобро од популарните лекови против кашлица, кои содржат декстрометорфан.
Според нутриционистот Лорен О Конор, консумирањето мед може да помогне во ублажувањето симптоми на некои гастроинтестинални проблеми како што се дијареја, запек и чиреви. Клиниката Мајо тоа го поткрепува цитирајќи докази кои сугерираат дека може дури да помогне во намалување на проблемите, пишува Eat This, Not That.
Медот, исто така, може да ве заштити од слободните радикали. Медот има антиоксидативни предности кои го штитат телото од оштетувања на клетките. Со додавање малку мед во вашиот појадок со житарки или смути, може да го заштитите срцето.
„Само набавете висококвалитетен, минимално обработен мед. Антиоксидансите ги штитат клетките од оштетување на слободните радикали и спречуваат појава на различни болести, вклучително и на срцеви заболувања“, вели нутриционистот Бријана Видс.
Кои недостатоци на медот ги посочуваат експертите?
Медот може да биде штетен за забите поради шеќерот и може да го зголеми ризикот од кариес. Покрај тоа, може да биде проблематичен за луѓето со замастен црн дроб бидејќи содржи фруктоза.
Исто така, мит е дека медот може да ги ублажи симптомите на алергија. Всушност, медот може да има спротивен ефект.
„Во некои случаи, консумирањето мед може да придонесе за алергиски симптоми бидејќи за премногу чувствителните луѓе внесувањето на полен дури и во мали количини може да предизвика локални симптоми како чешање во устата“, вели д-р Лакаја Рајт.
