Конор Мекгрегор минатиот викенд се покажа како лош губитник откако поради тешка повреда на зглобот борбата со Дастин Поарје беше прекината по докторска одлука.
Додека судијата го прогласуваше победникот, Мекрегор од седечка положба во кафезот викаше, се закануваше, а особено невкусен беше неговиот речник кон сопругата на Поарје.
Со навредите се префрли и на социјалните мрежи, вчера на Twitter објавуваше обвинувања, па ги бришеше, а меѓу нив беше и порака којашто може да се сфати како закана за смрт кон петгодишната ќерка на Поарје.
Во една објава постави три фотографии од Поарје, на една од нив е со ќерката, а покрај неа напиша „Gonezo“. Зборот сам по себе не значи ништо и на интернет веднаш почнаа расправи за тоа што сака да го каже Конор.
ММА аналитичарот Лука Фјури објасни дека станува збор за сленг, збор изведен од зборот „gone“, којшто во овој контекст значи „замине“ или „го нема повеќе“. Тоа значи дека би можело да се протолкува како закана за смрт.
„Сега почна да се заканува на невино девојче затоа што ја изгуби борбата. Одвратно“, напиша Фјури. „Многу е разочарувачки да се следи ваквиот пад на Мекрегор. Во ред е да изгуби, сите великани губат, но достоинството треба да се сочува. Последните години стана нестабилен пред нашите очи. Конор е скршен на повеќе нивоа“, напиша тој.
Зборот „gonezo“ можеби и не означува закана со смрт, но со самата објава на фотографија од детето Мекгрегор дефинитивно ја премина границата на невкусно и непримерно однесување.