Германската канцеларка Ангела Меркел денеска изјави дека имигрантите кои се доселуваат во Германија се Германци и покрај нивните имиња кои звучат како да припаѓаат на странци, пренесе Reuters.
Меркел зборуваше на церемонијата на одбележувањето на 60-годишнината од потпишувањето на договорот меѓу Германија и Турција, со кој се доведени стоици илјади Турци во Германија како работна сила во текот на 60-тите години.
Во таа прилика германската канцеларка ја критикуваше честата навика на Германците да ги прашуваат Турците родени во Германија од каде доаѓаат.
„Имиграцијата не може да биде напор на седум генерации кој никогаш не завршува едноставно затоа што не се виакте Клаус или Ерика. Прашање е колку долго личноста која очигледно нема германско име мора да се интегрира пред да биде интегрирана. Мислам дека секој би требал да има шанса на крајот кога ќе добие германско државјанство, да се смета како дел од оваа земја и тука името не треба да игра улога“, порача канцеларката.
Во 2015 година Меркел донесе одлука Германија да прифати скоро милион баратели на азил, повеќето од Сирија и Ирак. Оваа одлука донесе меѓународни пофалби, но предизвика критики во нејзината земја.
Германската сојузна агенција за вработување процени дека на Германија се потребни околу 400.000 мигранти годишно поради недостаток на работна сила.
Германија вложи милијарди долари во курсеви за јазици и обука за да им помогне на имигрантите да влезат на пазарот на труд, учејќи од грешките со турските работници кои немаа никаква помош да го научат јазикот и да ги унапредат вештините.
