Европа не може да ги реши сите светски проблеми, а особено не оние што се премногу комплицирани, како што е овој на Блискиот Исток, изјави денеска германската канцеларка Ангела Меркел.
Меркел повтори дека Германија го поддржува правото на Израел на самоодбрана, како и дека Берлин смета дека масовната акција на ИДФ е „вистинска работа“. Но, додаде, дека не верува дека воената акција ќе придонесе за мир во регионот.
-Од друга страна, ние ќе придонесеме во дипломатските обиди што ќе донесат траен мир и долгорочно решение, рече германската канцеларка, додавајќи дека еден од начините да се постигне тоа е да се одржат индиректни разговори со Хамас.
Таа, да потсетиме, претходно кажа дека Израел има право да се брани, но погледите на светската јавност сè уште се насочени кон Појасот Газа, во кој 11 дена траат конфликтите меѓу Хамас и силно вооружениот Израел.
Сите напори, дури и оние што доаѓаат од личноста која има најголемо влијание врз Израел, американскиот претседател, досега не вродија со плод, додека има бројни анализи во медиумите кои покажуваат дека, ниту Израел, ниту Хамас, не се расположени за прекин на огнот. На Бенјамин Нетанјаху му одговара војнава поради можноста за формирање влада, а на милитантниот Хамас војната му треба за политички да го надмине ривалскиот Фатах.
