За да потпише за ПСЖ, Килјан Мбапе услови не само огромен договор до 2025 година, туку и значаен дел од влијанието во донесувањето одлуки клучни за функционирањето на клубот, тврди денеска Mundo Deportivo и објаснува каква е оваа невидена моќ на еден фудбалер.
Според каталонскиот медиум, Мбапе повеќе не е само играч, туку човек чиј глас, заедно со тренерот, спортскиот директор и претседателот, важи подеднакво кога се во прашање кадровските решенија за продажба и купување на играчи. Работите наводно отишле толку далеку што Мбапе составил список за пред „стрелачки вод“ во кој биле вклучени 14 луѓе од клубот.
Списокот е огромен
Меѓу тие 14 лица се тренерот Маурисио Почетино и 13 соиграчи, меѓу кои Тило Керер, Јулијан Дракслер, Данило Переира, Леандро Паредес, Андер Херера, Лајвин Курзава, Мауро Икарди, Пабло Сарабија, Хуан Бернат, Идриса Гује, Колин Дагба и Серхио Рико.
Катарските сопственици наводно веќе го одобриле списокот, а сега се водат разговори за тоа кого ПСЖ ќе донесе во текот на летниот преоден рок. Мбапе, исто така, наводно веќе го одобрил доаѓањето на Аурелиен Чоамени од Монако доколку ПСЖ успее да го земе пред Реал Мадрид кој исто така го посакува.
Французите пишуваат за поинаква распределба на моќта
Да потсетиме, претходно Le Parisien пишуваше за големите промени во ПСЖ, но не во режија на Мбапе. Во ПСЖ, откако Мбапе остана во клубот, дојде до промена на функцијата спортски директор. Бразилецот Леонардо го напушти клубот за да го преземе Луис Кампос, долгогодишниот спортски директор на Лил.
Според Le Parisien, Кампос е доведен како човек кој треба да ја креира спортската политика на ПСЖ во следните неколку години, со цел порационално да се трошат парите и конечно трофејот од Лигата на шампионите да стигне до „Паркот на принцовите“. Le Parisien денеска објави дека првиот чекор на Кампос ќе биде да го исчисти постоечкиот кадар.
Преодниот рок ќе покаже што е вистина
Според француските медиуми, дури десет играчи на кои не смета Кампос ќе го напуштат клубот во овој преоден рок. Тоа се: Серхио Рико, Лајвин Курзава, Тило Керер, Абду Диало, Леандро Паредес, Андер Херера, Данило, Идриса Гује, Јулијан Дракслер и Мауро Икарди.
Анхел Ди Марија кому му истече договорот веќе го напушти клубот, а многу медиуми пишуваат дека од врвот на ПСЖ пристигнуваат информации дека шеиците се спремни да слушаат понуди за Нејмар. Тие не се склони да продаваат, но ако некој стави на маса сума што би ги заинтригирала, тие се отворени за преговори.
Во оваа верзија на расплетот се споменува и позицијата на Маурицио Почетино, исто како и со Мбапе, но овојпат само како позиција за која треба да се разговара, а не нужно како позиција во која ќе дојде до промена. Што е всушност точно за овие шпекулации ќе биде јасно кога ќе заврши преодниот период наесен.