Откако му истече договор и истиот не му беше продолжен од страна на Јувентус, колумбискиот репрезентативец се одлучи за крајно неочекуван потег.
Хуан Куадрадо низ осумте сезони во дресот на Јуве најмногу се прослави на натпреварите против Интер. Често даваше голови, асистираше, но и се тепаше. Сега ќе го облече токму црносиниот дрес.
Како што пренесуваат медиумите од Италија, Куадрадо веќе се договорил со Интер за едногодишен договор, а медицинските прегледи се закажани за деновиве, по што ќе биде ставен и потпис на договорот.
Хуан Гиљермо Куадрадо Бељо во мај наполни 35 години. Кариерата како дете ја почна во Атлетико Урабá, а низ младинската школа на Индепендиенте од Меделин се проби во сениорскиот фудбал. Оттаму дојде во Удинезе, играше како позајмен за Лече, потоа три сезони блескаше во Фиорентина, па следуваше трансфер што требаше да му биде врв на кариерата - во премиерлигашот Челси. Англискиот фудбал се покажа дека не му лежи, па откако одигра само 15 натпревари си замина по само една година, па тоа лето 2015 година почна авантурата во Јуве, која заврши тек сега. Куадрадо во 8 години во клубот од Торино одигра 314 натпревари, постигна 26 голови и асистираше 65 пати.
Омилен противник му беше токму Интер против кого одигра и најмногу натпревари - дури 26. На Интер му има дадено и најмногу голови од било кој друг противник - 6, а против Интер има добиено и најмногу картони и тоа дури 10 жолти и 1 црвен. Токму овој играч сега ќе игра за Интер, трансфер со кој „Нераѕурите“ ќе решат едно гајле - повеќе нема да играат против овој страшно мотивиран противник - сега тој ќе игра за нив.
А, тие 10 жолти не ги доби бадијала, половина му се за тепачки и караници. Последната таква беше пред само три месеци кога се тепаше со голманот Самир Хандановиќ, а претходно влезе во дуел и со Ромелу Лукаку. Интересно, двајцата само што си заминаа од Интер.