Тренерот на Рома, Жозе Мурињо, го критикуваше системот на натпреварување во Копа Италија, бидејќи според неговото мислење не ги штити помалите клубови.
Реакцијата на Мурињо уследи откако Рома избори пласман во четвртфиналето на Купот на Италија, совладувајќи ја синоќа Џеноа со минимални 1:0, и во четвртфиналето ќе игра против победникот од дуелот меѓу Наполи и Кремонезе.
„Би сакал Рома да ја освои Копа Италија. Еднаш успеав во тоа со друг клуб против Рома, а сега сакам да го повторам со мојот тим. Меѓутоа, мислам дека ова е најлошото куп натпреварување во Европа, бидејќи не ги штити помалите клубови, Копа Италија воопшто не е шоу. На пример, Торино на гостински терен го победи Милан, а потоа и следниот натпревар мора да го игра како гостин“, рече Мурињо.
Португалскиот стратег има трофеј во Копа Италија со екипата на Интер во сезоната 2009/2010.