На сенегалскиот голгетер Садио Мане му беа потребни само 5 минути за да го постигне својот прв гол во дресот на Баерн, постигнувајќи го од пенал на пријателскиот натпревар против ДиСи Јунајтед во кој неговиот тим победи со 6:2, а Матајс Де Лихт исто така беше стрелец на деби гол.
На самиот почеток од натпреварот Баерн доби пенал, а Мане ја презеде одговорноста, ја испрати топката на левата страна и иако голманот ја прочита неговата намера, не можеше да го запре силниот удар.
Само седум минути потоа Марсел Сабитцер погоди за 2:0, а Серж Гнабри го по асистенција на Мане во 44. минута направи 3:0, резултат со кој се замина на пауза.
Преку Матајс де Лихт и Џошуа Зиркзе, Баерн успеа да постигне уште два гола во 47. и 51. минута, при што стоперот од Холандија го постигна првиот гол за својата нова екипа по само две минути на теренот откако влезе во игра на паузата.
Скаге Леланд намали на 5:1, а потоа Ку-ДиПјетро на 5:2, додека Томас Милер со гол во 2. минута од судиското надополнување ги постави конечните 6:2 и голема победа над американскиот тим.
Натпреварот се одигра на „Ауди Филд“ стадионот во Вашингтон, дом на ДиСи Јунајтед.
Баерн кратката американска турнеја ја завршува в недела рано утрината кога во Грин Беј ќе се сретне со Манчестер Сити, а потоа се враќа за Германија каде на 30-ти треба да го игра ДФБ суперкупот против Лајпциг.
Де Лихт и Мане летово пристигнаа во Баерн како големи засилувања од Јувентус и Ливерпул, а потсетуваме дека клубот го напушти првиот напаѓач и најголема ѕвезда, Роберт Левандовски, кој кариерата ја продолжи во Барселона.