Холадскиот селектор Франк де Бур има необичен начин на известување на играчите кои беа на поширокиот список, но потоа отпаднаа и нема да патуваат на Европското првенство.
Де Бур веќе го објави конечниот список под 26 фудбалери, а сега се појави необично видео од моментот кога еден играч дознава дека за него нема место.
Се работи за офанзивецот на Астон Вила, 26-годишниот Анвар Ел Хази, кој сезонава постигна 10 голови во Премиер лигата и многумина очекуваа да е сигурен патник.
„Ова е списокот на 26 фудбалери на кои сметам за Европското првенство. Што би било доколку би имал можност да повикам 27 играчи? Мислам дека Ел Хази би бил на списокот“, изјави Де Бур на прес-конференцијата кога го објавуваше списокот.
Начинот на кој несреќниот Ел Хази дозна дека е вишок во репрезентацијата е крајно необичен и несериозен за еден селектор. Ел Хази правеше интервју со еден холандски новинар кога доби порака на телефонот и тоа од селекторот, а таа гласеше:
„Во овој момент не можам да те понесам на ЕУРО“, стои во СМС пораката на Де Бур до Ел Хази.
„Тоа е пораката која штотуку ја примив. Остатокот ќе го задржам за себе“, вели Ел Хази кој не сакаше да сподели сѐ што му напишал селекторот.
Ел Хази е Мароканец, но е роден во Холандија и ги има поминато сите младински репрезентации.
Тео Јансен, поранешен холандски репрезентативец, е разочаран од начинот на кој Де Бур му јави на играчот на Астон Вила дека нема да оди на ЕУРО.
„Бизарно... Јави му се на човекот бидејќи ова е важно за него. Живее за тој настан и се надева дека ќе игра на првенството, а потоа добива најобична порака. Таков разговор не трае долго, сѐ што Де Бур требаше да направи е телефонски да му објасни што се случило и да му овозможи шанса да му одговори на прашањата кои би ги имал“, вели Јансен.
Холандија пред првенството ќе одигра пријателски натпревари против Шкотска на 2 јуни и против Грузија четири дена подоцна. На континенталниот собир е во нашата Ц група заедно со Украина и Австрија, а последниот натпреавр на 17 јуни го игра со Македонија во Амстердам.