Повеќе од два тони кокаин спакуван во кеси, со проценета пазарна вредност од речиси 150 милиони евра, беа откриени на францускиот брег во Ла Манш минатиот викенд и во средата, изјави во четвртокот добро информиран извор.
Во неделата наутро на плажата во Ревил, на северозапад, биле пронајдени неколку кеси со околу 850 килограми кокаин.
Во средата во Виси-сур Мер беа пронајдени уште шест кеси. Овој пат станува збор за тон и пол кокаин, што е вкупно 2,3 тони, „историска“ количина, вели изворот. Јавното обвинителство во Шербур започна истрага на почетокот на неделата.
Не е утврдено од каде се херметички затворените вреќи пронајдени на брегот. Тие можеби биле фрлени во морето за да се избегне контрола или можеби паднале од бродот во морето, рекол изворот.
Инспекторите се обидуваат да утврдат како дрогата стигнала на брегот. Полицијата соопшти дека „внимателно го следи“ секторот од воздух.
Ова не е првпат да се најде кокаин на францускиот брег. На крајот на 2019 година, на плажата од Сент Жан-де-Луз до Камарето беа пронајдени вкупно 1,6 тони кокаин.
На крајот на мај 2022 година, беше најден кокаин со тежина од околу 21 кг на плажата во Берк, на северот на Франција.
Во средата, на прес-конференција посветена на билансот во 2022 година во борбата против трговијата со дрога, Габриел Атал, министерот за финансии, извести за „историска“ заплена на 1,9 тони кокаин во пристаништето Авр, на северозапад.
Во 2022 година во Франција се запленети 27,7 тони од оваа дрога, што е зголемување за 5 отсто во однос на претходната година.
