Рафаел Надал напорно тренира за почетокот на новата сезона, а во разговор со шпанските медиуми се осврна на изминатава сезона и најави продолжување на борбата за Грен слен трофеите.
Шпанскиот тенисер минатава сезона освои два Грен слема и со тоа дојде до вкупно 22. Новак Ѓоковиќ има 21, додека Роџер Федерер кариерата ја заврши со 20 Грен слем пехари.
„Иако имав доста проблеми со повреди, мината сезона за мене беше одлична, на крајот на краиштата освоив два Грен слем турнири. Имав проблеми со повреди и испаѓа дека цело време само за тоа зборувам, но повеќе не сакам да се жалам. Се чувтсвувам многу подобро и ќе бидам подготвен за почетокот на сезоната“, вели Надал.
Шпанецот понуди интересен одговор на тоа кој е најголемиот тенисер на сите времиња.
„Мојот став се нема променето. Тешко ќе биде да се дефинира кој е најголемиот на сите времиња бидејќи секој од нас тројца (Ѓоковиќ, Федерер) има свои аргументи, а двајца уште сме активни играчи. Сепак, за мене најважно е дека сите тројца имаме направено далеку повеќе отколку што сме замислувале, а на тој пат испишавме страници историја. Дали на крајот ќе бидам најдобриот на сите времиња? Би сакал, но тоа не ми е опсесија“, заврши Надал.
