Шок во Бергамо. Алехандро Гомес е на излезна врата од Аталанта поради големи несогласувања со тренерот Џан Пјеро Гасперини.
„Драги навивачи аталантисти, ви пишувам овде бидејќи нема друг начин да се бранам и да зборувам со вас. Само сакам да ви кажам дека кога ќе си заминам ќе се открие вистината. Вие ме познавате и знаете каква личност сум. Ви посакувам сѐ најдобро, вашиот капитен“, напиша популарниот Папу Гомес на Instagram, а потоа го избриша напишаното.
Тој објави и фотка со својот агент Алехандро Накарато со што веднаш потпали шпекулации дека бара нов клуб уште за во зимскиот преоден рок.
Гомес и Гасперини се скараа на натпреварот од 5. коло во Лигата на шампионите одигран на први месецов кога Аргентинецот беше заменет на полувреме. Потоа одигра 90 минути на наредниот натпревар со Ајакс, но во неделата со Фиорентина преседа на клупата за резерви. Гасперини потегот го оправда дека на Гомес му требал одмор.
„Не знам како ќе се надмине ситуацијава. Ќе одлучи управата, но како и да е мораме секогаш да гледаме кон иднината и да не застануваме бидејќи ќе ризикуваме да назадуваме. Папу за нас беше најважен играч годинава, но поставувањето како вечен играч веќе стана комплицирано“, изјави Гасперини.
32-годишниот Гомес е дел од Аталанта од 2014 година кога пристигна од редовите на украински Металист. Сезонава на 15 натпревари постигна 5 голови и 4 асистенции во Серија А и во Лигата на шампионите, додека минатата сезона одигра 46 натпревари на кои постигна само 8 голови, но дури 18 пати асистираше.