По поразот од Интер минатото коло сега тимот на нашиот Елмас загуби уште едно дерби откако со 2:0 беше поразен во Рим.
Петти пораз за „Партенопеите“ на Елиф Елмас откако синоќа потклекнаа во Рим. Уште по само девет минути игра најдобриот калчоголгетер Чиро Имобиле ја затресе гостинската мрежа. Црногоренот Адам Марушиќ нафрли од левата страна, а Чиро се вивна во гостинскиот шестнаесетник и со глава го совлада Давид Оспина. Ова беше осми гол за Имобиле сезонава.
Македонскиот репрезентативец Елиф Елмас во игра влезе во 55. минута на местото на Матео Политано, но само што истрча на теренот домаќините зголемија на 2:0 преку Луис Алберто.
До крајот немаше промена на резултатот па Лацио освои три бода со кои се искачи на делба на 7. место со Аталанта со 21 бод, додека Наполи остана петти со 23.
