Елиф Елмас и официјално повеќе не е фудбалер на Наполи откако синоќа стави потпис на договорот со бундеслигашот Лајпциг.
По 4 и пол години минати во клубот од Неапол, Елмас одлучи да си замине во потрага по поголема минутажа. Во Наполи остави 189 натпревари во сите конкуренции, 19 постигнати голови и 11 асистенции, како и освоено едно Скудето и една Копа Италија.
Клубот знаеше како да му се заблагодари за поминатите 4 и пол години, па објави компилација од некои од неговиоте најдобри моменти во дресот на тимот од под Везув.
„Ти благодариме за емоциите што ни ги подари. Сега те чека нов предизвик, а ние секогаш ќе бидеме тука да навиваме за тебе. Чао Елиф“, твитна клубот.
Во коментарите под видеото се забележуваат негодувањата на навивачите на „Партенопеите“ поради заминувањето на Елмас. Тие сметаат дека Наполи прелесно се откажал од одличен играч кој пополнувал повеќе позиции во тимот и дека неговото заминување е уште еден чекор назад на клубот кој по освојувањето на Скудетото лани оди само во надолна линија, пад кој почна со разделбата со тренерот Лучано Спалети.