После два неуспешни обиди, НАСА успеа да ја лансира својата нова мегаракета Artemis 1 од Кејп Канаверал на Флорида до Месечината, помалку од една недела откако џиновската машина ги издржа налетите на моќниот ураган.
„Моторите изгледаат добро“, рече НАСА нешто повеќе од 5 минути по лансирањето на ракетата која патува со речиси 10.000 км/час (поточно 9.655 км/час).
Мисијата Artemis 1, шестнеделен пробен лет без астронаути, е првиот чекор во плановите на американската вселенска агенција да воспостави долгорочна лунарна колонија на Месечината, како отскочна даска за уште поамбициозни идни патувања со екипаж на Марс.
Тоа е првиот пробен лет на огромната двостепена ракета Space Launch System (SLS) и нејзината беспилотна капсула Orion. Иако на леталото нема да има луѓе, Orion ќе носи симулиран екипаж од тројца - еден машки и две женски кукли - опремени со сензори за мерење на нивото на радијација и други стресови што би ги доживеале астронаутите.
Прогласена за најмоќна во светот
Наведена како најмоќната и најсложена ракета во светот, SLS го претставува најголемиот нов систем за вертикално лансирање изграден од американската вселенска агенција откако Saturn V полета на Месечината за време на програмата Apollo во 60-тите и 70-тите.
Именувана по сестрата близначка на Apollo од грчката митологија, новата вселенска програма е развиена 50 години откако луѓето последен пат стапнале на лунарното тло.
