Надзорниот авион AWACS на НАТО пристигна во Романија денеска за да го зајакне источното крило на Алијансата и да помогне во следењето на руската воена активност.
Првиот распореден авион за набљудување слета во воздухопловна база во близина на Букурешт, а се очекува уште два да слетаат во текот на денот и в среда. Авионите треба да останат во Романија неколку недели.
НАТО минатата недела објави дека ќе распореди авиони за набљудување на системот за воздушно предупредување и контрола (AWACS) во Букурешт, каде што ќе започне со извидувачки летови исклучиво над територијата на НАТО.
„Во контекст на илегалната војна на Русија против Украина, НАТО ќе ја следи воената активност на источното крило со помош на авионите AWACS“, објави романскиот министер за одбрана Ангел Тилвар на Facebook.
НАТО го зголеми своето воздушно присуство во Источна Европа и Балтикот откако Русија ја нападна Украина минатиот февруари, користејќи борбени авиони, авиони за набљудување и танкери.
Авионот распореден во Романија припаѓа на флота од 14 авиони за набљудување на НАТО вообичаено со седиште во Германија. Тие можат да детектираат други авиони на стотици километри оддалеченост, соопшти НАТО.
„Додека илегалната војна на Русија во Украина продолжува да ги загрозува мирот и безбедноста во Европа, не смее да има сомнеж решеноста на НАТО да ја заштити и брани секоја педа од сојузничката територија“, рече портпаролката на НАТО, Оана Лунгеску, објавувајќи го распоредувањето на овие авиони на 12 јануари.