Второлигашот Осогово останува најактивен и со најголема кампања за време на кризата со коронавирусот.
Овој пат кочанчани излегоа со нова оригинална идеја. В собота на 23-ти месецов, карантинско Ел Класико за љубителите на фудбалот: Осогово против COVID-19.
Картите за натпреварот се веќе пуштени во продажба и чинат симболични 100 денари. Можат да се набават онлајн и тоа со клик тука, а во продажба и на одредени места.
Нормално, натпреварот нема да се игра на зелениот терен туку е замислен. Целта на кампањата е да му се помогне финансиски на клубот од Кочани. Билетите се во неограничени количини, а секој добротворец може да купи неограничен број на билети.
„Во овој историски натпревар ГФК Осогово покренува акција во борба против неочекуваниот, незгодниот и најомразен противник: COVID-19.
Ова е Карантинско „ЕЛ Класико“ во кое нашата одбрана мора да биде цврста и негативна, а вашата поддршка несебична и гласна! Фудбалот се игра за фанови и навивачи и токму ние за вас први ја отвораме сезоната на натпревари.
Поддржи го нашиот клуб, поддржи го фудбалот. Вистинските навивачи се нашата надеж. Ова е единственото финале на кое секој може да присуствува.
*Натпреварот и времето на одигрување се замислени, но билетот останува засекогаш!
Со секој купен билет му помагате на клубот во понатамошното функционирање и исполнување на целите за периодот кој претстои“, стои во клупското соопштение.
