Антички череп од човек кој живеел во Латвија може да ја крие тајната за тоа како црната чума убила милиони луѓе низ Европа во најсмртоносната пандемија во човековата историја.
Истражувачите од Универзитетот во Кил, Германија, синоќа открија дека бактеријата позната како Yersina pestis била откриена во примероци земени од останките на ловец-собирач пронајдени во Латвија. Нивниот труд објавен во научното списание Cell вели дека човекот, кој бил во неговите 20-ти години, живеел пред околу 5 илјади години.
Ова откритие може да има големо влијание врз разбирањето на сегашните и идните пандемии. Научниците велат дека оваа рана варијанта на црната чума веројатно била помалку заразна и помалку смртоносна од онаа која ги опустошила Европа и Азија убивајќи помеѓу 75 и 200 милиони луѓе во периодот од 1347 до 1351 година. Причинител на болеста била токму бактеријата Yersina pestis.
Бен Краузе-Кјора, член на тимот кој стои зад откритието, за списанието New Scientist вели дека бактеријата веројатно почнала како бенигна инфекција пред да еволуира и да стане многу смртоносна.
„Веројатно била хронична, сеприсутна инфекција. Секако, редизвикувала смрт, но веројатно не била толку сериозна како што потоа станала во Средниот век“, вели тој.
Сепак, високата концентрација на бактерија пронајдена во фрагмент од черепот сугерира дека латвискиот праисториски човек бил еден од несреќниците. „Да се има јасна слика на раната еволуција на овој смртоносен патоген е навистина интересно. Гледаме дека била похронична и побезопасна на почетоците пред да стане многу посмртоносна“, додава Краузе-Кјора.
Сепак, оваа хипотеза ја ставаат во прашање други универзитети велејќи дека сѐ уште нема доволно докази за да се донесе заклучок дека првите инфекции биле многу поподносливи.
На почетокот од минатиот месец, руски научници објавија дека вратиле во живот антични микроскопски организам, познат како ротифера, која минала 24.000 години во сибирскиот мраз. Суштеството се врати во живот, почна да се храни и да се размножува.
