Навални од затвор: Овде е како во концентрационен логор

Откако беше осуден на две и пол години затвор, рускиот опозициски лидер Алексеј Навални за првпат се огласи на социјалните мрежи од затворската единица на 100 километри оддалеченост од Москва, по неколкунеделен медиумски молк.

Иако руски активисти тврдеа дека точната локација на Алексеј Навални во моментов не е позната, главниот противник на Владимир Путин реши да проговори по неколку недели шпекулации, од затворската единица ИР-2 во Покрово и да ги опише животните услови во овој неславен руски затвор.

Како што се наведува, Навални најверојатно им ја диктирал содржината на соопштението на своите адвокати, кои ги пренеле неговите зборови на тимот задолжен за комуникација на социјалните мрежи.

„Три работи никогаш не престануваат да ме воодушевуваат. Ѕвезденото небо над затворот, категоричниот императив што доаѓа од нас и неверојатното чувство кога со дланката ќе поминам преку избричената глава. Поздрав до сите од сектор А кои се под засилен надзор“, вели навални во почетокот на објавата.

Во продолжение на соопштението, Навални зборува за условите во затворот и ја опишува затворската единица во Покрово како „концентрационен логор“.

„Морам да признаам дека рускиот систем ме изненади. Не знаев дека може да се организира вистински концентрационен логор на 100 километри од Москва. Сè уште не сум забележал знаци на насилство, иако атмосферата меѓу затворениците е крајно напната. Верувам во многу приказни што доаѓаат од Покрово. Една од нив е дека тепале затвореници со дрвени чекани, речиси до смрт. Сега методите се променија и искрено не можам да се сетам на место каде што сите се љубезни како тука. Сега ова го нарекувам пријателски концентрационен логор“, вели Навални во објавата.

„Забрането е пцуење и користење жаргонски зборови. Оваа забрана строго се почитува. Камерите има насекаде, а во случај на најмало дело може да добиете пријава. Мислам дека надредените го читале романот на Орвел ‘1984’. Меѓутоа, ако набљудуваш сè со одредена доза хумор, можеш да преживееш“, вели Навални.

Тој на крај опиша низа други детали од затворската единица, наведувајќи дека на секој затвореник има исцртано фотографија и име на градите.

Покрај тоа, Навални ја искористи можноста да ги поздрави сите истомисленици на крајот од објавата и да испрати порака до сите руски активисти да не губат контакт со своите најблиски.