НБА ги објави имињата на тројца кандидати за МВП наградата во сезоната 2022/23.
Очекувано, Никола Јокиќ е едно од предложените имиња, покрај Јанис Адетокунбо и Џоел Ембиид. Тројцата беа во потесниот круг и минатата сезона кога центарот на Денвер ја освои втората последовна награда за најкорисен играч.
Српскиот кошаркар е на добар пат да го направи тоа третпат по ред, со што би им се придружил на Вилт Чемберлејн, Бил Расел и на Лери Бирд како единствени играчи со по три МВП признанија.
Според најновиот пресек на НБА лигата, токму Јокиќ е главен фаворит откако уште еднаш ја прескокна „петката“ на Филаделфија Џоел Ембиид. Неговиот Денвер го освои првото место на Запад за прв пат во историјата. Имаше просек од 24,5 поени, 11,8 скока и 9,8 асистенции.
Ембиид е водечки стрелец во лигата со просек од 33,1 поен. Покрај тоа, има 10,2 скока и 4,2 асистенции. Адетокунбо зад себе ја има најдобрата шутерска сезона со просек од 31,1 поен со 11,8 скока и 5,7 асистенции.
Во Топ 10 се најдоа и Џејсон Тејтум, Донован Мичел, Домантас Сабонис, Шаи Гилгес-Александер, Лука Дончиќ, Џејмс Харден и Кевин Дурант.
Не е познат точниот датум на доделувањето на оваа престижна награда.
Честа да ги прочита имињата на кандидатите ја имаше екипата од познатото шоу Inside the NBA, составено од пензионираните кошаркари Шекил О'Нил, Кени Смит и Чарлс Баркли и водителот Ерни Џонсон.
На ред дојде Баркли да ги прочита кандидатите за МВП наградата. Легендата на НБА имаше големи проблеми со имињата.
„Џанис од Бакс“, почна Баркли, на што остатокот од тимот праша: „Како се презива?“
„Антекумпо...“ несигурно одговори Баркли и продолжи да чита. Немаше проблем со Џоел Ембиид од Филаделфија 76ерс, а потоа дојде на ред и Јокиќ. „Никола Јокик од Денвер Нагетс“, прочита Баркли.
„Колку долго треба да играат овие луѓе за да им ги научат имињата?“, праша водителот.
„Јас го викам Џокер. Ембиид го викам Ембиид. Јанис е Грик Фрик. Не сме тука на часови по англиски", одговори Баркли.