Очигледно Барселона има намера наредниот преоден рок шопингот да го прави во Милано откако по голгетерот Лаутаро на листата на желби се најде и словачкиот дефанзивец.
Како што открива Mundo Deportivo, Каталонците сакаат својата одбрана да ја засилат со Милан Шкринијар. Репрезентативецот на Словачка има пазарна вредност од 70 милиони евра што е проблем за Барса поради тоа што нивните финансии не одат во добар правец.
Барселона отвора нов фронт во трансфер дуелот со Интер. Во тефтерот со желби на клубот од „Камп Ноу“ влегол и Словакот, а таму веќе е дефанзивното триот на Јувентус и тоа Матајс де Лихт, Даниеле Ругани и Матија Де Шиљо. Ако најскапата варијанта е Де Лихт, тогаш Шкринијар и не е многу поефтин со оглед на долговите кои ги има Барса.
Сепак, Mundo Deportivo е докажан извор на точни информации кога станува збор за Барса бидејќи весникот е многу близок до луѓето во клубот, што во минатото многу пати го докажал со објавување на точни информации. Велат дека планот на Барса е да ја намали цената на Шкринијар со што во трансферот ќе го вметне Французинот Самуел Умтити, па Интер би добил и пари и замена.
Досегашните преговори на Барса за трансфер на Лаутаро не дојдоа ни блиску до договор со оглед на тоа што Интер сака да добие чисти пари или пак помала сума, но со вметнување на Артуро Видал, единствениот играч на Барса на кого „Нераѕурите“ му имаат фрлено око. Претпоставката е дека во иста насока би се одвивале и преговорите за Шкринијар.