Превиткувањето на зглобот од левата нога по еден лизгачки старт на противнички играч го прати Нејмар во агонија од болка, а се востанови дека ќе мора да паузира до два месеца.
Бразилскиот фудбалер мораше на носилки да го напушти теренот од стадионот „Жофроа-Гишар“ каде во неделата неговиот ПСЖ со 3:1 го совлада домашниот тим на Сент-Етјен. Повредата се случи во 84. минута, но се покажа кобна за Нејмар.
Противничкиот фудбалер Ивон Макон не стартуваше директно врз ногата на Нејмар, туку Бразилецот како последица од стартот лошо згазна виткајќи го левиот долен згоб под крајно непридоден агол.
„Медицинските прегледи потврдија дека Нејмар има истегнување на левиот зглоб со повреда и на лигаментите. Се очекува да биде надвор од теренот 6 до 8 недели. За 72 часа ќе излеземе со ново соопштение во кое ќе прецизираме што и како со опоравувањето“, извести клубот.
На социјалните мрежи се јави и самиот Нејмар изјавувајќи: „Нажалост вакви падови се дел од животот на еден спортист. Сега мора да се исправи главата и да се продолжи понатаму. Ќе се вратам подобар и посилен“.
Најлошото сценариот е дека Нејмар би се вратил на почетокот од февруари, додека најоптимистичкото е дека би бил подготвен во втората недела од јануари. Првичните испитувања велат дека лигаментите не се оштетени, само истегнати, што е добра вест доколку се потврди дерка е навистина така.
