По потпишувањето на договорот со Ал Хилал, Нејмар зборуваше за улогата на Кристијано Роналдо во развојот на лигата на Саудиска Арабија.
Бразилецот дојде од Пари Сен-Жермен во трансфер вреден 90 милиони евра.
„Сѐ започна со Кристијано Роналдо. Кога кон крајот на минатата година дојде во Саудиска Арабија, сите велеа дека е луд. А сега гледате една лига која се развива со неверојатна брзина. Воодушевен сум што ќе играм против врвни играчи. Тоа ве мотивира да бидете уште подобри“, рече Нејмар.
Еден од најпопуларните играчи на денешницата по 6 години го напушти Париз, а незадоволни беа и тој и челниците на клубот. Ал Хилал беше најдоброто и најбогатото решение.
„Мило ми е што сум овде. Кога знаеш дека противници ќе ти бидат Роналдо, Бензема, Фирмину, воодушевувањето е уште поголемо. Очекувам сите Бразилци да навиваат за Ал Хилал, се разбира“, додаде 31-годишниот Нејмар.
Новата сезона во Саудиска Арабија веќе почна, се одигра едно коло, а Ал Хилал славеше со 3:1 на гостувањето кај Абха. Дебито на Нејмар се очекува в сабота кога неговиот тим ќе ја пречека Ал Фејха.