Британскиот боксер Ентони Џошуа на 12 декември во Лондон ќе ја брани титулата светски шампион во тешка категорија во верзиите WBA, IBF и WBO против Кубрат Пулев.
Веста за закажаниот натпревар Кубрат Пулев вчера ја објави на својата веб-страница.
Борбата требаше да се одржи на 20 јуни во главниот град на Велика Британија, но беше одложена поради пандемијата на COVID-19.
„Официјално е: Пулев против Џошуа на 12 декември во Лондон. Датумот и местото на настанот се конечни. Нема враќање, нема одложување, нема ново закажување. Нека победи подобриот“, се наведува на веб-страницата на бугарскиот боксер.
Во соопштението не е наведено дали е планирано присуство на публика, поради мерките за заштита од ширење на коронавирусот.
Се шпекулира дека промоторот на британскиот шампион, Еди Херн, е подготвен да го одржи мечот на Блискиот Исток, ако таму биде дозволено присуство на публика.
Џошуа го победи Енди Руиз за титулата во Саудиска Арабија во декември.
Пулев чека натпревар со Џошуа веќе три години, откако се повлече од борбата во октомври 2017 година поради повреда на рамото.