Голема шарена риба Опа се насука на брегот на Орегон минатата недела. Ретката риба со тежина од околу 45 килограми, позната и како Мунфиш (Месечева риба), е откриена на плажата Сансет во градот Сисајд.
„Овие риби се ретки за брегот на Орегон“, објави Seaside Aquarium на Facebook, каде објавија и неколку фотографии од рибата.
Кит Чендлер, извршен директор на Seaside Aquarium, за CNN изјави дека е многу невообичаено оваа риба да се најде на брегот на Орегон и да е во одлична состојба.
„Тие се прилично кул риби и обично не ги гледаме на бреговите. Беше прилично возбудливо за локалното население“, рече Чендлер.
Според Националната управа за океани и атмосфера (НОАА), малку се знае за овој вид риби бидејќи живеат длабоко во океанот. Видот обично се наоѓа во умерени и тропски води.
Поради состојбата во која е пронајдена рибата, Чендлер верува дека била на плажата помалку од еден час пред вработените во аквариумот да бидат известени.
Бидејќи рибата не преживеала, се чува во голем замрзнувач, а аквариумот планира соработка со една локална организација за да се сецира рибата за да дознае повеќе за овој вид.
