Македонскиот напаѓач постигна ефектен гол со глава помагајќи Удинезе да направи сензационален пресврт против пампионот, додека Лацио конечно успеа по 5 натпревари пауза да забележи победа.
На три минути пред полувремето Јувентус го скрши отпорот на домаќините и преку Матајс де Лихт поведе со 0:1.
После паузата, се играше 52. минута кога Удинезе замина во контра, Кен Сема нафрли во шестнаесетникот каде, во стил на Кристијано Роналдо, нашиот репрезентативец Илија Несторовски со глава ја затресе мрежата на Војчех Шченсни. За Иле ова е само трет гол сезонава, но сигурно ќе му биде најсладок.
Во првата минута од судиското надополнување Секо Фофана направи дар-мар ала Марадона, претрча цела половина, ги издрибла сите пред него и погоди за целосен пресврт и победа на Удинезе од 2:1.
Ова се важни три бода за тимот на Несторовски бидејќи сега на три кола до крајот има 7 подови предност во однос на Лече кој ја држи последната позиција од опасната зона.
Лацио го пречека Каљари на „Олимпико“ и и покрај тоа што напаѓаше и имаше шанси, гостите беа тие кои ја затресоа мрежата први. Џовани Симеоне, синот на Диего Симеоне, со помош на домашната одбрана секунди пред полувремето донесе водство.
Само што почна вториот дел Сергеј Милинковиќ-Савиќ со еврогол израмни на 1:1. Во 60. минута „Бјанкочелестите“ направија комплетен пресврт и тоа со голот на стрелецот број 1, Чиро Имобиле. За него ова е гол број 31 сезонава, со што повторно е пред Кристијано Роналдо на листата на стреци. Португалецот има 30.
Со овие два натпревара се комплетираше 35. коло, па сега табелата во Калчото изгледа вака: