После 16 години популарната серија го добива долгоочекуваното продолжение.
Компанијата Netflix на својот YouTube канал го објави првиот трејлер за серијата „That '90s Show“, која е директно продолжение на популарната „That '70s Show“, кај нас позната како „Луди 70-ти“, која се прикажуваше од 1998 до 2006 година.
Првиот трејлер нѐ враќа во Поинт Плејс, а приказната на серијата ќе ги прати Леа, ќерка на Ерик и Дона, која летото ќе го минува кај баба ѝ Кити и дедо ѝ Ред, каде ќе запознае ново друштво и своето слободно време ќе го поминува во добро познатиот подрум.
Всушност, иако во трејлерот можеме да ги видиме Тофер Грејс (Ерик), Лора Препон (Дона), Ештон Качер (Келсо), Мила Кунис (Џеки) и Вилмер Валдерама (Фез) - старите глумци од оригиналната серија се враќаат само како гости, а приказната ја прати Леа и нејзиното друштво под будното око (и нозе) на дедо Ред. Единствени кои остануваат во главна улога се Кртвуд Смит (Ред) и Дебра Џо Рап (Кити).
За жал, помеѓу старите глумци нема да можеме да го гледаме и Стивен Хајд, бидејќи актерот Дени Мастерсон се соочува во тужба за силување на три девојки помеѓу 2001 и 2003 година, односно додека серијата „That '70s Show“ сѐ уште се емитуваше.
Серијата „That '90s Show“ премиерно ќе биде прикажана на најпопуларната стриминг платформа на 19 јануари 2023, а гледачите ќе имаат можност низ 10 епизоди да ја запознаат новата генерација и да ги проследат нивните авантури.
