Српскиот кошаркар Никола Јокиќ продолжи да игра одлични партии во НБА лигата и во 2023 година, а синоќа во победата на неговиот тим Денвер против Бостон со резултат 123:111 забележа нов трипл-дабл учинок и со тоа уште еднаш потврди дека игра во најдобрата форма во животот.
Јокиќ беше убедливо прво име на натпреварот, а на крајот мечот заврши со 30 поени и 12 скока и асистенции, а интересно, на теренот мина 32 минути и не загуби ниту една топка.
Американските медиуми, кои секогаш сакаат да извлечат интересни информации, наведуваат дека Јокиќ е првиот играч во историјата кој има повеќе натпревари со трипл-дабл учинок од 30 поени и нула загубени топки. Во каква форма игра, најдобар показател е дека ова е негов петти трипл-дабл во последните осум натпревари.
Севкупно, ова беше 84-ти трипл-дабл за Јокиќ во кариерата и моментално е на шестото место на сите времиња по бројот на вакви учиноци.
Што се однесува до играта, по првите 12 минути Денвер имаше предност од 37:28, а домашните водеа со 62:54 на полувремето.
Денвер продолжи да игра добро и во третата четвртина и дополнително ја зголеми предноста, а на крајот успеа да ја сочува и да дојде до победата. Во другите натпревари Мемфис на домашен терен го победи Сакраменто со 118:108, додека Вашингтон како гостин го победи Милвоки со 118:95.