Играчот од средниот ред на македонската репрезентација ветува дека тој и неговите соиграчи ќе одат на победа в сабота иако ќе им недостасува публиката.
Македонија во сабота против Ерменија ја отвора новата сезона од Лигата на Нации. Бобан Николов, кој настапува за унгарскиот Фехервар, е оптимист, иако вели дека ќе му недостасува публиката, а додатна потешкотија ќе претставува и тоа што УЕФА го смести натпреварот во скопскиот пекол од 15:00 часот.
„Мислам дека имаме доволно време до сабота да се подготвиме. Мислам дека ќе бидеме спремни, не сме се виделе 10 месеци, но оваа група е заедно веќе 3-4 години така да имаме време до сабота. Ќе одиме на победа, но тоа треба да го покажеме на терен. Мое мислење е дека сме фаворити во групата, но сѐ зависи од нас затоа што тоа треба да го покажеме на терен“, вели Николов.
„Поминавме многу тежок период позади нас, што ниеден фудбалер не го посакува. Еве и сега, ќе играме против Ерменија во 15 часот, ќе биде пекол, но тоа не треба да ни биде алиби. Ќе излеземе за да победиме. Многу ќе ни фали пибликата која е 12-тиот играч на оваа репрезентација и ќе беше сѐ подруго. Ќе играме фудбал без публика, малку ми е чудно, но на тоа ќе мора да се навикнеме, не е до нас и сѐ ќе направиме да победи“, заврши тој.