Српскиот тенисер Новак Ѓоковиќ по речиси четири часа игра и еден од најтешките мечеви во кариерата го совлада Карлос Алкарас и го освои АТП мастерсот во Синсинати. По средбата и за време на прославата го скина дресот и потоа стана многу емотивен.
За Ѓоковиќ ова беше трета титула во Синсинати, а по одличниот натпревар го скина дресот и со тоа покажа колку се грижи за овој турнир.
Бидејќи сето ова дојде по голем пресврт, а воедно и најдолгото финале во историјата на овој турнир, Ѓоковиќ не можеше да го сокрие својот ентузијазам.
„Некои фази од натпреварот ги добиваше еден играч, други друг играч. Почнав добро, па физички се мачев, а тој го искористи тоа, имаше водство во сетот и брејк предност. Кога го освоив брејкот, помислив дека имам шанса, се борев и верував... Во третиот сет имав шанси, а меч топката при 5:3 во гемови беше неверојатна и илустрација на целиот овој натпревар. Ова беше еден од највозбудливите и најтешките натпревари во мојата кариера – психички, емотивно и физички“, рече Ѓоковиќ и продолжи:
„Алкараз не ме изненадува, импресивно е како победува на големи натпревари, секогаш е храбар во најважните моменти од натпреварот. Треба да му се симне капа, тој игра зрело и одлично се справува со притисокот за некој што има 20 години. Чувството на теренот ме потсети како да играв против Надал, кога бевме во зенитот на нашите кариери. Секој бод беше борба, чувствуваш дека во целиот натпревар нема да освоиш пет лесни поени, туку дека мора да се заработи секој од нив“.
Новиот дуел на овие двајца тенисери, кој без никакво сомневање би бил уште еден вистински спортски спектакл, би можел да се случи на УС опен кој започнува на 28 август.
