Олаф Шолц од Социјалдемократите е именуван за деветти канцелар на Германија. Му следува и ново возило со новата функција.
Канцеларот Шолц ќе добие нов службен автомобил со специјална заштита.
Mercedes-Benz S 680 Guard е целосното име на новиот блиндиран автомобил кој германските даночни обврзници ги чини најмалку 547.400 евра.
Овој модел не е направен исклучиво за Шолц, како што е случајот со некои слични државни лимузини, како оние што ги користат американските претседатели. Возилото е достапно за сите оние кои можат да си го дозволат.
За „обичната“ S класа потребни се 50 часа работа, а за Guard - 50 дена! Сè започнува со изградбата на „кафезот“ од специјален челик, карбонски влакна и стакла ламинирани со непробојна фолија дебела десет сантиметри.
Потоа на возилото се монтира фабричката каросерија. Резултатот ги исполнува највисоките стандарди: државните инспектори испукаа над 300 истрели од автоматска пушка во лимузина и активираа 12 килограми пластичен експлозив до неа пред да ѝ дадат сертификат VR10.
Покрај балистичката заштита, оваа S класа има и гуми отпорни на дупчење, автоматски апарат за гаснење пожар и систем за компримиран воздух кој може да спречи навлегување на отровни гасови.
Идејата беше да се задржи продукциската форма бидејќи повеќето од овие возила Mercedes ги продава на клиенти кои се во опасност, како шефови на држави, кои сепак сакаат да останат незабележани од јавноста.
Mercedes му го додели на Guard најголемиот и најмоќниот мотор што се нуди - 6.0 V12 со 450 kW / 612 КС, кој развива максимални 830 Nm.
Просечно троши 19,5 литри бензин (емисии на CO2 442 г/км).
Додека стандардната S класа постигнува електронски ограничени 250 км/ч, Guard „едвај“ достигнува 190 км/ч, но со маса од 4,3 тони тоа е разбирливо.
Поради зголемената тежина, обемната технологија и нагласеното наклонување во свиоци, Mercedes им нуди на клиентите посебен курс за возење за овој модел.
