Јужноамериканските квалификации за Мундијалот 2026 продолжија ноќеска и минаа во знакот на брилијантниот Лео Меси, изненадувачката победа на аутсајдерот Венецуела и тешко повредениот Нејмар кој ќе го пропушти остатокот од сезоната.
Колото го отвори дуелот на Венецуела и Чиле. Домашните во овој натпревар влегоа осоколени по одличната претстава на гости кај Бразил и освоениот бод. Венецуела го изненади и надигра Чиле и успеа да слави со убедливи 3:0 освојувајќи го седмиот бод во квалификациите, со што сериозно стави дознаење дека атакува на нивен прв пласман на Мундијалите. При 1:0 им помогна и фактот што Марселино Нуњес доби втор жолт, па Чилеанците мораа да доиграат со десетмина.
Стадион „Монументал“, Матурин
Венецуела - Чиле 3:0
45'+1 Јеферсон Сотелдо, 72' Саломон Рондон, 79' Дарвин Мачис
Дуелот на двата соседа Парагвај и Боливија, познати како земји со најголем процент на домородно население во Јужна Америка, заврши со минимална победа на популарните „Гуарани“. Одлучувачки беше голот на напаѓачот на калчолигашот Торино, Санабриа, кој на дваесетина минути пред крајот го скрши цврстиот отпор на Боливијците.
Стадион „Дефенсорес дел Чако“, Асунсион
Парагвај - Боливија 1:0
69' Антонио Санабриа
Најдосадно во поглед на голови беше на соседското дерби меѓу Еквадор и Колумбија, кои ги поделија бодовите играјќи со најнепопуларниот резултат. Но, не дека натпреварот немаше возбудувања. Гостите во 61. минута можеа да дојдат во водство кога Џоанер Чавес наивно стартуваше над Џоан Ариас, но напаѓачот на Ливерпул, Луис Диас, не го реализираше ударот од белата точка - голманот Моисес Рамирес добро го прочита. Набрзо потоа Карлос Куеста ја затресе еквадорската мрежа, но ВАР го поништи голот поради индиректниот офсајд на Рафаел Боре.
Стадион „Родриго Пас Делгадо“, Кито
Еквадор - Колумбија 0:0
На стадионот на кој во 2030 ќе биде отворен Мундијалот 2030, Уругвај го нагости Бразил, во буквална смисла. На три минути пред паузата Максимилиано Араухо убаво мина крај Маркињос, нафрли полувисоко до Дарвин Нуњес кој потклекна и со глава го отвори резултатот.
На самиот крај од полувремето Нејмар лошо нагази по еден дуел за топка со Николас де ла Крус и веднаш се фати за ногата. Во солзи и на носилки беше изнесен, а на негово место влезе Ришарлисон. Според првичните информации, напаѓачот на Ал Хилал има сериозна повреда на вкрстените лигаменти на левото колено и го чека операција, што значи дека за него оваа сезона е завршена.
Во 77. минута Де ла Крус стави точка на победата на „Селесте“ откако Нуњес одлично му асистираше. Ова е прв пораз на Бразил во овие квалификации.
Стадион „Сентенарио“, Монтевидео
Уругвај - Бразил 2:0
42' Дарвин Нуњес, 77' Николас де ла Крус
Перуанците ја имаа честа да го пречекаат актуелниот светски шампион Аргентина, но беа неуспешни во мусијата да му се спротивстават. Меси беше двоен стрелец во првиот дел, а особено впечатлив беше првиот гол кога од прва погоди со помош на гредата.
Меси со головите против Перу стигна до 31 гол во мундијалските квалификации, со што го престигна Луис Суарес и стана најдобар стрелец во историјата на јужноамериканските квалификации за Светско првенство.
Стадион „Насионал“, Лима
Перу - Аргентина 0:2
Наредното коло сзе игра на 16 ноември, а се среќаваат: Боливија - Перу, Венецуела - Еквадор, Аргентина - Уругвај, Колумбија - Бразил и Чиле - Парагвај.