Џанлука Фереро (60) официјално беше назначен за нов претседател на италијанскиот фудбалски гигант Јувентус, откако Андреа Ањели поднесе оставка на крајот на ноември минатата година.
Целиот Управен одбор на Јувентус, вклучително и претседателот Ањели и потпретседателот Павел Недвед, поднесоа оставки во тоа време поради наводите за измама во сметководството.
Фереро беше кандидатот на Exor, холдинг-компанијата на семејството Ањели, која контролира 63,8 отсто од акциите на најуспешниот италијански клуб со 36 титули во Серија А.
На генералното собрание утринава, акционерите избраа нов одбор на директори на функција до 2025 година, кој потоа го назначи Фереро за претседател и Маурицио Сканавино за извршен директор.
Новите раководни челници ќе имаат задача да ја подобрат спортската состојба на „Старата дама“, но пред сè загрижувачката финансиска состојба.
Клубот забележа загуби од повеќе од 200 милиони евра, а е на мета и на италијанското правосудство поради можни финансиски неправилности и лажно сметководство.
Јувентус моментално е на третото место во Серија А со 37 бодови, односно 10 помалку од водечкиот Наполи.