Археолозите откриле мала спална соба во римска вила во близина на Помпеја која, според сите релевантни откритија, ја користеле робови, фрлајќи светло на нивниот низок статус во античкиот свет, соопшти синоќа Министерството за култура на Италија.
Собата е пронајдена во вилата Чивита Џулиана, некои 600 метри северно од ѕидините на Помпеја, која, како што е познато, била уништена од вулканска ерупција на Везув пред речиси две илјади години.
Во собата има два кревета, од кои само еден имал душек, две мали орманчиња и низа урни и керамички садови во кои се пронајдени остатоци од глувци и стаорци.
„Овие детали уште еднаш ги нагласуваат несигурностите и лошата хигиена во кои ниските слоеви на општеството живееле во тоа време“, се наведува во соопштението на италијанското Министерство за култура, а пренесува Reuters.
Материјалите како намештај и ткаенини, покриени со разорниот удар на фрагменти од карпи, гас и пепел од Везув, се распаднале со текот на годините, оставајќи празнини во натрупаното. Кога овие празнини ќе се наполнат со гипс, го откриваат оригиналниот облик и контури на одамна исчезнатиот материјал, вклучително и контурите на стутканиот покривач оставен на мрежата за кревет.
„Изгледа како фотографија... Меѓутоа, ова е слика од пред речиси две илјади години“, соопшти министерството.
Не се пронајдени траги од решетки, брави и ланци кои би ги задржале станарите во собата.
„Се чини дека контролата првенствено била вршена преку внатрешна организација на послугата, а не преку физички бариери и ограничувања“, вели Габриел Цухтригел, директор на Археолошкиот парк „Помпеја“.
Министерот за култура, Џенаро Санџулиано, во неделата изјави дека напорите за зачувување и истражување ќе продолжат.
„Она што го учиме за материјалните услови и општествената организација од тоа време отвора нови хоризонти за историски и археолошки студии“, рече тој.
