Станува збор само за краток вовед во она што нѐ чека во следната HBO Originals серија која многумина едвај чекаат да излезе.
Американскиот кабловски гигант HBO пред повеќе од две години најави дека една од најдобрите игрици кои некогаш се појавила на Sony конзола, доколку сте ја купиле во омот, ќе добие своја ТВ адаптација.
Прецизен датум за премиерата на серијата „The Last of Us“ сѐ уште нема, но барем добивме кратка најава која трае помалку од 2 минути. Една информација која се врти околу премиерата е 2023 година, што има логика, но времето ќе покаже.
Главните улоги на Џоел и Ели им се доверени на Педро Паскал (познат од „Game of Thrones“ и „The Mandalorian“) и Бела Рамзи („Game of Thrones“).
Од останатите ликови, Томи му е доделен на Габриел Луна (Терминаторот во оној последен несреќен филм), додека Тес ќе ја толкува Ана Торв (од врвната и непрежалена серија „Mindhunter“).
Како коавтори на сценариото се потпишани авторот на игрицата Нил Дракмен од студиото Naughty Dog и Крег Мејзин, кој е мозокот зад серијата „Chernobyl“.
Типично за HBO, првата сезона ќе има 10 епизоди, а во најавата која следува имаме прилика да видиме одвратни зомбија на чело со едно кое изгледа посебно морничаво (можеби тоа ќе биде главен лик?), клокот на живи мртовци, уништена и опустошена градска слика и многу емоции на секој од прикажаните ликови во нивниот блесок низ трејлерот.
Вистината е дека едвај чекаме да ја гледаме серијата, а се чини дека истовремено ќе можеме да ја играме и „The Last of Us Part I“ игрицата за компјутер, ако им веруваме на твитерџиите...