Барселона синоќа го победи Ваљадолид со 3:0 на гостувањето во рамките на 15-тото коло во Ла Лига со головите на Ленгле, Брејтвејт и Меси.
За Аргентинецот тоа беше 644. гол за Барселона, надминувајќи го Пеле по бројот на голови за еден клуб. Бразилскиот великан имаше постигнато гол помалку за Сантош, а тоа беше рекорд за кој никој не помислуваше дека некогаш ќе биде срушен.
Ова е само уште еден во низата рекорди кои Меси ги постави во пребогатата кариера во која ги полуде противничките голмани. Еден од нив е Јан Облак, кој по повод соборувањето на рекордот на Меси, од прва рака за Sky Sports објасни колку е тешко да се справите со ѕвездата на Барса.
„Тој гледа сè. Не го покажува тоа, вие не го гледате тоа кај него, но тој гледа сè. Ако направам чекор на едната страна, тој ќе го регистрира и ќе забие на другата. Постојано ве гледа и ве следи. Очите му се насочени кон топката, но тој точно знае што правиш“, рече Облак и продолжи:
„Ми има забиено ужасно многу голови, дефинитивно премногу. За мене тој е најдобриот играч на светот. Многупати кога ми дал гол не сум бил ни свесен што направил. Не можеш ни да сфатиш како ти дал гол, не си ни блиску до одбрана. Понекогаш не ни изгледа дека воопшто ја погодил топката, туку само ја проследил во голот. Има натпревари кога не игра добро и кога си сигурен дека твојата екипа го има под контрола. Тој е невидлив, не му оди и одеднаш постигнува гол и го свртува натпреварот.“
Ни еден од најдобрите тактичари во светот, Диего Симеоне, честопати не успеваше да најде начин да се одбрани од Меси.
„Ние голманите често урламе од голот и им помагаме на дефанзивците да се постават, но кога играте против него, нема помош. Тактички ни ти не можеш да се поставиш затоа што не можеш да погодиш што ќе направи. Ако си премногу блиску, ќе те помине. Ако си премногу далеку, ќе шутира. Невозможно е“, вели Облак.
