Првото електрично возило што ќе ги користи овие батерии е Geely Zeekr 009.
Кинескиот CATL моментално е рангиран како најголем производител на батерии во светот. Компанијата сега објави дека започнала со производство на еден од своите водечки производи наречен Qilin Battery, а исто така откри и кој ќе биде првиот електричен автомобил што ќе има корист од новата батерија.
Според бројни кинески медиуми, CATL успешно ги заврши сите тестови за масовно производство на својот Qilin. Главната причина за успехот е поголемата енергетска густина, до 255 Wh/kg.
Меѓу квалитетите на новата батерија е и можноста да се вози до 1.000 километри пред да треба да се наполни пак. Тоа значи дека со едно полнење може да возите од главниот град на Македонија до главниот град на Италија, Рим (997 км), до Виена, Австрија (1.040 км) или Измир, Турција (1.064 км), на пример.
Самото полнење може да се направи од 10% до 80% капацитет за само 10 минути.
Првото електрично возило кое ќе ги користи овие батерии е Geely Zeekr 009. Овој кинески миниван веќе направи тестови со првите прототипови на оваа батерија.
Првите испораки на моделот Zeekr 009 со батерија Qilin ќе започнат во вториот квартал од 2023 година.
Сепак, овој модел нема да биде единствениот со споменатите батерии бидејќи CATL е заинтересиран за масовно производство. Се шпекулира и за некои европски производители.
