Неконтролирано истекување на течност за ладење од руското вселенско летало Сојуз на Меѓународната вселенска станица (МВС) ја оштетило капсулата на екипажот, соопшти руската вселенска агенција Роскосмос.
Станува збор за „насилно истекување“ од вселенското летало Сојуз МС-22, откриено додека руските космонаути Сергеј Прокопјев и Дмитриј Пателин се подготвувале за вселенска прошетка надвор од Станицата. Станува збор за прошетка што требало да трае скоро седум часа.
Сепак, била откажана бидејќи вселенските одела почнале да губат притисок во воздушната комора. Камерите од надворешната страна на вселенската станица снимиле како излегува замрзната течност од капсулата Сојуз во вселената, додека космонаутите се враќале во главниот дел на станицата.
Екипажот е безбеден, а во извештајот навеле дека уредот за предупредување, кој е дел од дијагностичкиот систем, се огласил и покажал пад на притисокот во системот за ладење. Визуелната проверка го потврдила истекувањето, поради што е откажана вселенската прошетка.
Од друга страна, сите други системи на Станицата и на Сојуз функционираат нормално, така што екипажот е безбеден. Сепак, по анализата на целосната ситуација, ќе биде донесена одлука за следните активности на експертите. Слично соопштение објави и американската вселенска агенција НАСА, нагласувајќи дека екипажот во ниту еден момент не бил загрозен.
Како штетата на Сојуз ќе влијае на враќањето на екипажот МС-22 на Земјата во март, 2023 година, засега е непознато. Астронаутот на НАСА Френк Рубио е дел од тој екипаж. Исто така, не е познато што сè е оштетено од истекувањето.
Вселенските агенции не прецизираа какво средство за ладење истече од Сојуз, но амонијакот, кој е вообичаена течност за ладење во вселенските летала, може да биде корозивен за многу метали.
