Младинскиот културен центар Скопје распиша конкурс за дизајн на постерот за годинашното издание на фестивалот Здраво Млади.
„Во изминатите 10 години, на визуелниот облик на фестивалот имавме чест и задоволство да работиме со исклучително талентирани дизајнери на кои сме им неизмерно благодарни. Дизајнот за Здраво Млади 1, 2, 3 и 4 беше дело на нашиот вечен арт-директор Иван Петрушевски - Флим. Петтото и шестото издание го дизајнираше нашиот драг пријател од Загреб, Дарко Кујунџиќ, додека седмиот Здраво Млади го среди домашната Кристина Горовска. Лик на 8-то издание на фестивалот му даде Ѓорѓи Јаневски, а 9-тото и 10-тото издание го потпишаа другарите од fabricca“, потсетуваат од МКЦ.
Тие додаваат дека во тек се подготовките за 11-тото издание на фестивалот на нова музика и дека сакаат постерот/дизајнот за ова издание да го направи публиката.
„Некој/а што го сака фестивалот, кој/а имал/а идеја и замисла како може да изгледа ликот на омилениот негов/нејзин фестивал. Така што, доколку имате идеја и желба да бидете дел од фестивалот, седнете и изразете се најдоцна до 14 февруари и пратете ни предлог како мислите дека треба да изгледа дизајнот за Здраво Млади 11“, стои во соопштението.
Ќе бидат наградени три дизајни, од кои првонаградениот ќе биде официјалниот дизајн за Здраво Млади 11. Првата награда ќе биде во вредност од 12.000 денари, втората 5.000 и третата 3.000 денари.
Сите примени дизајни ќе бидат дел од групна изложба, која ќе се реализира во рамки на 11-тото издание на Здраво Млади закажано за 26 и 27 август 2021 во/околу МКЦ.
Вашите предлози испратете ги на info@mkc.mk со наслов „и јас сум ЗДРАВО МЛАДИ 2021“ најдоцна до 14 февруари 2021.
