На Волстрит цените на акциите паднаа бидејќи инвеститорите стравуваат дека каматните стапки ќе останат повисоки од очекуваните и бидејќи S&P го намали рејтингот на голем број регионални банки.
Dow Jones загуби 0,51 отсто, на 34.288 поени, а S&P 500 загуби 0,28 отсто, на 4.387 поени. Индексот Nasdaq зајакна, пак, за 0,06 отсто, на 13.505 поени.
Вчера најмногу падна индексот S&P 500 на банкарскиот сектор, во просек за 2,4 отсто, откако агенцијата Standard & Poor's го намали кредитниот рејтинг на голем број регионални банки бидејќи, како што објасни, наглото зголемување на каматните стапки е оптоварување на финансирањето и ликвидноста на многу американски банки.
Значително падна и цената на акцијата на Nvidia, речиси 3 отсто, откако претходниот ден скокна за повеќе од 8 отсто. Инвеститорите се повнимателни со акциите на производителот на чипови пред неговите квартални резултати в среда.
Цената на акцијата на Nvidia порасна за повеќе од 220 отсто од почетокот на годината, благодарение на еуфоријата околу развојот на вештачката интелигенција (ВИ). Сепак, деловните резултати ќе покажат дали има основа за ваков скок на цените.
Инвеститорите се претпазливи и од натамошниот пораст на приносите на американските обврзници. Приносот на 10-годишните државни обврзници вчера достигна ново највисоко ниво од 2007 година.
Приносите растат поради шпекулациите дека американската централна банка би можела да ги зголеми каматните стапки уште еднаш до крајот на годината или да ги задржи на покачени нивоа подолго од очекуваното.
Серијата неодамнешни податоци покажуваат дека пазарот на труд во САД останува силен, што би можело да поддржи понатамошен раст на потрошувачката, а со тоа и повисока инфлација.
Затоа во фокусот на инвеститорите в петок ќе биде средбата на лидерите на најголемите централни банки во светот во американскиот град Џексон Хол. Коментарите на водечките централни банкари за состојбите во економиите и каматните стапки би можеле значително да влијаат на насоката на пазарот.
И на европските берзи цените на акциите вчера пораснаа. Сепак, лондонскиот FTSE индекс порасна за 0,18 отсто, на 7.270 поени, додека франкфуртски DAX зајакна за 0,66 отсто, на 15.705 поени, а париски CAC за 0,59 отсто, на 7.240 поени.