Најдобриот фудбалер во македонската историја вели дека натпреварот е посебен за него, но сепак нема да биде на трибините на „Олимпико“ во петок.
Репрезентацијата на Македонија в петок од 20:45 часот во рамките на претпоследното коло во ЕУРО 2024 квалификациите ќе излезе на мегдан со актуелниот европски шампион Италија и тоа во Вечниот град.
Се разбира, секогаш кога „Аѕурите“ за противник ја имаат Македонија во италијанските медиуми главна ѕвезда е калчо-легендата Горан Пандев. Така е и деновиве.
Овој пат Пандев говореше за Il Corriere dello Sport.
„Натпреварот ќе го гледам на ТВ, нема да бидам во Рим. Ова е посебен натпревар за мене, па поради тоа нема да прогнозирам“, рече Пандев.
Пандев одигра 122 натпревара за Македонија на кои постигна 38 голови. Рекордер е во двете категории. Од репрезентацијата се повлече по ЕУРО 2020 во 2021 година, а од фудбалот една година подоцна.